Тест платформата за е-Фактура на Управата за јавни приходи работи од јануари 2026 и е отворена за секоја компанија: сметководствено биро, фирма со сопствен софтвер за фактурирање или софтверска куќа што интегрира преку API. Тест фактурите немаат правно ни даночно дејство, па тоа е единственото место каде што грешката не чини ништо. Ова упатство објаснува како да се регистрирате, што точно да тестирате и по кој редослед, така што на денот кога е-Фактурата ќе стане задолжителна вашите фактури веќе да поминуваат.
Ажурирано: 20 октомври 2026 — според предлог-законот и известувањата на УЈП. Доброволната фаза планирана за 1 октомври 2026 не започна, бидејќи законот сè уште не е донесен; системот работи само како тест платформа.
Каде е тест платформата и што ви треба
| Што | Каде |
|---|---|
| Документација и техничка спецификација | efakturawiki.ujp.gov.mk |
| Регистрација и доделување привилегии | eujptest.ujp.gov.mk/ureg |
| Тест платформа за е-Фактура | efakturatest.ujp.gov.mk |
| Поддршка од УЈП | Kontakt.eFaktura@ujp.gov.mk |
За регистрација ви треба квалификуван дигитален сертификат на лице овластено за фирмата. По најавата, овластеното лице им доделува привилегии на другите корисници: кој смее да издава, а кој да прима е-фактури. Според известувањето на УЈП од 8 мај 2026, во првата фаза 390 компании успешно се најавиле на системот, овластиле 781 корисници, а 89 компании се интегрирале и поднесувале е-фактури преку API.
Тест фазите досега
- Јануари 2026, прва фаза. Најава, регистрација на сертификати и размена на првите тест фактури. УЈП на 16 февруари објави дека 148 компании се регистрирале за тестирање и дека се верификувани 396 е-фактури.
- Мај 2026, втора фаза. Проширување на API: преземање, прифаќање, одбивање и сторнирање на е-фактура, и проширена листа на даночни индикатори, ознаките за даночниот третман на прометот. Забелешка од УЈП: фактурите доставени во првата фаза не се видливи во ажурираната верзија на системот.
- Јуни 2026, трета фаза. Веб апликација на тест платформата, за да може секоја компанија, без API интеграција, да проба креирање, испраќање, прифаќање, одбивање и сторнирање, со 12 даночни индикатори на стандардна фактура. УЈП избра околу 200 компании за структурирано тестирање со даночни агенти и одржа триесетина информативни средби преку коморите.
- Јули–октомври 2026, проширување. Нови типови документи (книжно одобрение и задолжение, авансна фактура, времена ситуација, фактура/испратница, фактура кон физичко и кон странско лице, увоз, самофактурирање и други), корекција на документ, внес на одбивка на влезен ДДВ, клиентска (desktop) апликација од 27 август, нова привилегија за интернет продавници (6 октомври), swagger.json и проширени JSON примери (8 октомври) и атрибути на фактура (15 октомври). Сите промени се објавуваат на страницата „Известувања“ на efakturawiki.
Што да тестирате, по редослед
1. Најава и привилегии
Проверете дека сертификатот на овластеното лице се прифаќа и дека секој корисник што ќе работи со фактури има точната привилегија. Најчестата пречка во првата фаза беше токму сертификатот: истечен, на погрешно лице или без овластување за фирмата.
2. Издавање на стандардна фактура
Креирајте фактура со сите задолжителни елементи по членот 53 од Законот за ДДВ: податоци за издавачот и примачот, реден број, датум на издавање и датум на промет, опис на стоките или услугите, основица и стапка на ДДВ по ставка. По успешна валидација платформата враќа единствен идентификатор и QR код; тоа е моментот кога фактурата се смета за издадена.
3. Даночни индикатори
Индикаторот кажува како е оданочен прометот: општа стапка, повластена стапка, ослободено со право на одбивка, ослободено без право на одбивка, надвор од предметот на ДДВ, пренесување на даночна обврска. Тестирајте по една фактура за секој третман што вашата фирма реално го користи. Погрешен индикатор е грешка во ДДВ пријавата, не само во фактурата.
4. Прием, прифаќање и одбивање
Тестирајте ја и другата страна: примете фактура од партнер на тест платформата, прифатете една и одбијте една. Предлог-законот предвидува примачот активно да ги прифаќа фактурите, па процесот на прифаќање во вашата фирма (кој гледа, кој одобрува, во кој рок) е дел од тестот, не само техниката.
5. Сторнирање и исправка
Сторнирајте тест фактура и издадете нова. Проверете како тоа се одразува во вашето сметководство: сторното мора да го поништи книжењето, а не само документот.
6. Архива
Зачувајте ја валидираната фактура во структурираниот формат што го враќа платформата, заедно со идентификаторот. Обврската за чување (по нацртот, во роковите од Законот за даночна постапка, во оригинална електронска форма) важи за структурираниот документ, не за PDF визуелизацијата; платформата на УЈП ги држи фактурите за преземање само 2 години по годината на издавање.
API или веб апликација?
Веб апликацијата е доволна за фирма што издава неколку фактури месечно и сака да го види процесот. Сè над тоа бара интеграција: софтверот за фактурирање или сметководство ја составува фактурата, ја потпишува со сертификатот на фирмата, ја испраќа преку API, го чува вратениот идентификатор и QR кодот и ги обработува прифаќањата и одбивањата. Ако користите готов софтвер, прашајте го добавувачот дали е тестиран на efakturatest и во која фаза.
Градите софтвер што треба да издава е-Фактура? Merot e-Faktura API издава, прима и архивира УЈП е-фактури преку едно
POST /v1/einvoicesAPI-повик, со потпишување преку Merot Bridge (Windows, macOS и Linux) и sandbox за тестирање пред продукција. За компании без сопствен софтвер за фактурирање, истото доаѓа вградено во Merot ERP (во подготовка, ноември 2026).
Роковите што ги поставува предлог-законот
Предлог-законот за електронско фактурирање, објавен на ЕНЕР на 12 август 2026 за јавна консултација, сè уште не е донесен (состојба 20 октомври 2026). Предвидува:
| Датум | Кој |
|---|---|
| 1 октомври 2026 | доброволна примена: не започна, законот не беше донесен навреме; нов датум не е објавен |
| 1 април 2027 | задолжително издавање и прием за сите ДДВ обврзници |
| 1 јули 2027 | правни лица што не се ДДВ обврзници, а вршат дејност |
| 1 октомври 2027 | буџетски корисници и институции |
| 1 јануари 2028 | сите останати субјекти |
Датумите се од предлог-текстот и може да се променат до донесувањето на законот; директорката на УЈП во септември 2026 најави донесување до крајот на 2026 и задолжителна примена по фази во 2027. Внимание: кога доброволната фаза ќе се отвори, регистрираниот субјект мора сите фактури да ги издава преку системот, па регистрирајте се дури кога сте спремни. Правната рамка, обврските и казните се објаснети во е-Фактура во Македонија: сè што треба да знаете.
Чек-листа пред задолжителната примена (по нацртот 1 април 2027)
- Квалификуван сертификат за фирмата и за секое лице што потпишува
- Регистрација на тест платформата и распределени привилегии
- По една успешно валидирана тест фактура за секој даночен индикатор што го користите
- Тестирани прием, прифаќање, одбивање и сторно
- Софтвер кој го чува идентификаторот и QR кодот и ги архивира е-фактурите во оригинална електронска форма
- Интерна процедура: кој прифаќа влезни фактури и во кој рок
Најчести прашања
Дали тест фактурите на УЈП имаат правно дејство? Не. Фактурите издадени на тест платформата (efakturatest.ujp.gov.mk) немаат правно ни даночно дејство — тие служат само за проверка на интеграцијата.
Што ми треба за да се регистрирам на тест платформата? Квалификуван дигитален сертификат на лице овластено за фирмата, преку eujptest.ujp.gov.mk/ureg.
Дали треба API интеграција за да тестирам? Не задолжително. Веб апликацијата (трета тест фаза, јуни 2026) е доволна за фирма што издава неколку фактури месечно; поголем обем бара интеграција преку API.
Од кога е задолжителна е-Фактурата? Законот сè уште не е донесен, па доброволната фаза планирана за 1 октомври 2026 не започна. Според предлог-законот задолжителна е за ДДВ обврзници од 1 април 2027, а потоа поетапно до 1 јануари 2028 за сите.
Кој формат го бара УЈП, UBL или JSON? Сопствена JSON структура на УЈП, потпишана како JWS со квалификуван сертификат; спецификацијата и примерите се на efakturawiki.ujp.gov.mk.
Дали Merot нуди sandbox за тестирање? Да — Merot e-Faktura API вклучува sandbox за тестирање пред продукција, покрај интеграцијата со тест платформата на УЈП.
Технички: како да го поврзете вашиот софтвер со УЈП е-Фактура
За тимови што градат интеграција: developer.merot.com/mk/efaktura/quickstart/ содржи чекор-по-чекор упатство, целосна OpenAPI референца и примери на код на 6 јазици (cURL, Node.js, Python, PHP, C#, Java) за издавање, прием, валидација и архивирање преку Merot e-Faktura API.
Merot ERP и е-Фактура
Merot ERP (во подготовка, ноември 2026) издава е-фактури со сите задолжителни елементи и даночни индикатори, ги книжи автоматски и ги чува со идентификаторот во архивата на фирмата. Сметководствените бироа работат со сите клиенти од една најава. За интеграција достапна веднаш: Merot e-Faktura API.
Објавено септември 2026, ажурирано 20 октомври 2026. Извори: УЈП, известување „е-Фактура: втора тест фаза“ од 8 мај 2026; УЈП, известување за третата фаза од 4 јуни 2026; Предлог закон за електронско фактурирање, ЕНЕР, 12 август 2026; efakturawiki: известувања и промени, октомври 2026. Проверете ги актуелните упатства на efakturawiki.ujp.gov.mk пред тестирање.